काठमाडौं । सरकार एसईई र कक्षा ११–१२ को परीक्षा सञ्चालन गर्ने पक्षमा रहेको देखिएको छ । परीक्षाको विकल्प खोजिनुपर्ने आवाज उठिरहेको बेला शिक्षा, विज्ञान तथा प्रविधिमन्त्री गिरिराजमणि पोखरेलले मन्त्रालय परीक्षा सञ्चालन गर्ने पक्षमा रहेको जनाएका हुन् ।
शिक्षा पत्रकार समूहले आयोजना गरेको भर्चुअल प्रेस मिटमा बोल्दै शिक्षा मन्त्री पोखरेलले विभिन्न विकल्प अपनाएर भएपनि परीक्षा लिने पक्षमा आफू रहेको बताएका हुन् ।
यस्तै जाडो र गर्मी विदा, चाडपर्व विदा घटाउनका साथै अतिरिक्त कक्षा बढाएर भएपनि शैक्षिक सत्र खेर जान नदिने तयारी भइरहेको मन्त्री पोखरेलले जानकारी दिए ।
मन्त्रालयले कोरोना भाइरस रोग (कोभिड(१९) को रोकथाम तथा नियन्त्रणमा सघाउन साथै, शिक्षालाई कसरी अगाडि बढाउन सकिन्छ भनेर विज्ञहरुको समिति बनाएको र सो समितिको सुझाबका आधारमा अन्य योजना बनाउने मन्त्री पोखरेलले बताए ।
पूर्व विज्ञान मन्त्री गणेश साहको संयोजकत्वमा गठित २८ सदस्यीय समितिमा विषयविज्ञहरू सम्मिलित ६ वटा उपसमितिसमेत गठन गरिएको उनले जानकारी दिए ।
विषयगत समितिहरुलाई शैक्षिक क्यालेन्डर, अनलाइन कक्षा सञ्चालन, प्रयोगात्मक अभ्यास, पाठ्यक्रम, तालिम, परीक्षा सञ्चालन र निरीक्षणलगायत योजना बनाउने विषयमा सुझाब दिने जिम्मेवारी दिइएको र भोलिसम्ममा प्रतिवेदन आउने सम्भावना रहेको मन्त्री पोखरेलले स्पष्ट पारे ।
भोलि मन्त्रिपरिषद्ले लकडाउन सम्बन्धमा लिने निर्णय र विज्ञ समितिको सुझाबको आधारमा शिक्षाको आगामी योजना बनाइने मन्त्री पोखरेलले जानकारी दिए ।
लकडाउन सकिएको पहिलो हप्ता विद्यालय तहको नतिजा प्रकाशन र दोस्रो हप्ता विकल्पका आधारमा भर्ना शुरु गर्ने गरी तयारी भइरहेकोसमेत मन्त्री पोखरेलले जानकारी दिए ।
विद्यालयमा बाक्लो उपस्थिति हुने र फेस टु फेस कन्ट्र्याक हुने भएकाले लक डाउन खुलेपनि निश्चित दुरी राखेर खोल्नुपर्ने बाध्यता रहेको उनले सुनाए ।
२०७७ बैशाख १३ गते १७:०९मा प्रकाशित
