• बुटवलकी निकिता खनालको ४ जीपीए
    (ईपाटी संवाददाता)


  • काठमाडौं । एसइइ परीक्षामा बुटवलकी निकिता खनालले सबै विषयमा ए प्लस प्राप्त गरेकी छन् । बुटवल शंकरनगरको सिद्धार्थ इंलिस बोर्डिङ स्कूलबाट परीक्षा दिएकी उनले सबै विषयमा ए प्लस ल्याएर  ४ जीपीए प्राप्त गरेकी हुन् ।
    उनको सिम्बोल नम्बर ०४८३४४४Z रहेको छ ।


    कक्षा १ सम्म स्कलर्स होम बोर्डिङ स्कूलमा पढेकी उनले २ कक्षा देखि सिद्धार्थमा पढेकी हुन् । कक्षा १ देखि नै प्रथम र द्धितीय हुँदै आएकी थिइन् ।
    उनले डाक्टर बन्ने लक्ष्य रहेको सुनाइन् । अब काठमाडौं गएर पढ्ने उनले बताइन् ।


    घोकेर भन्दा बुझेर पढ्ने गरेको भन्दै उनले भनिन्– ‘म रातभर कहिल्यै पढिन् थोरै पढेँ तर, बुझेर पढेँ ।’


    ‘ल्याउन त ४ जीपीए ल्याउछु भनेर पढेको थिए । शुरुमा नतिजा सुन्दा विश्वास लागेन पछि खुसी लाग्यो । मिहिनेत गरे सकिने रहेछ ।’ उनले भनिन्– ‘शुरुमा ठूलो बुवाले नतिजा सुनाउनुभयो । पछि बुवाले फोन गरेर बधाइ दिनुभयो ।’


    बुवा मनिराम खनाल बन विभाग अन्तर्गत प्युठानमा अधिकृत छन् । आमा तुलसा खनाल गृहणी हुन् ।


    सिद्धार्थ इंलिस बोर्डिङ स्कूलका प्रिन्सिपल यमबहादुर राना निकिताको नतिजाले विद्यालय परिवारमै हर्षित बनाएको बताए ।


    ‘निकिता आफै ४ जीपीए ल्याउनेमा ढुक्क देखिन्थिन् । हामीलाई पनि आशा थियो ।’ प्रिन्सिपल रानाले भने– ‘कुल ४ जिपिए मा ४ नै हासिल गरेकाले टप भएकोमा दाबी त रहने नै भयो ।’ यस विषयमा आफूहरुले थप बुझिरहेको उनको भनाइ थियो ।

    सिद्धार्थ स्कूलबाट यसवर्ष १३६ जनाले एसइइ परीक्षा दिएका थिए ।


     जसमा २१ जनाले ३.६ देखि ४.० जीपीए, ५२ जनाले ३.२ देखि ३.६ जीपीए, ४५ जनाले २.८ देखि ३.२ जीपीए र ८ जनाले २.४ देखि २.८ जीपीए ल्याएका प्रिन्सिपल रानाले जानकारी दिए ।


    यसवर्ष एसइइ परीक्षामा मुलुकभरबाट १०६ जनाले ४ जीपीए ल्याएका छन् ।