२०७६ कार्त्तिक २९ गते

सेनेटरी प्याडले विद्यालय नियमित

अन्तैबाट

जुम्ला । दुर्गा मावि तातोपानी लाम्रामा कक्षा १२ मा अध्ययनरत तारादेवी गिरी यसअघि महिनावारी भएको बेला पढाइ छाडथिन् । विद्यालयमा सेनेटरी प्याडको व्यवस्था नहुँदा उनलाई लाजैका कारण विद्यालय जान समस्या थियो । कक्षा १० मा अध्ययनरत अस्मिता चौलागाईको पनि महिनावारीको बेला पढाइ छुट्थ्यो ।

विद्यालयमै सेनेटरी प्याडको व्यवस्था भएपछि उनीहरू मात्र होइन, अधिकांश छात्राको पढाइ नियमित भएको छ । पहिलो चरणमा सबै विद्यार्थीलाई पुग्नेगरी सेनेटरी प्याडको व्यवस्था गरिएको छ । महिनावारीका बेला स्थानीय बजारमै पाइने कपडाको प्याड बनाइ प्रयोग गर्ने विधिबारे सिकाइएको विद्यालयले जनाएको छ ।

सन्ध्या फाउन्डेसनले लाइन्स क्लब अफ काठमाडौं नर्भिकको सहयोगमा विद्यालयका छात्रालाई सेनेटरी प्याड वितरणसँगै प्रयोगको विधि विद्यालयमै सिकाएको हो । फाउन्डेसनका अनुसार विद्यालयमा अध्ययनरत २ सय छात्राले प्याड बनाउने विधि सिकेका हुन् ।

‘विद्यालयमै प्याड बनाउने विधि सिकेपछि घरबाटै प्याड बनाएर झोलामा राख्ने गरेकी छु,’ गिरीले भनिन्, ‘विद्यालयमै प्रजनन समस्या समाधानका उपायबारे तालिम लिएपछि अप्ठ्यारो हटेको छ, पढाइ नियमित बनेको छ ।’

चौलागाईंले आफूले सिकेका सीप र प्याड बनाउने उपायबारे गाउँमा समेत सिकाउन थालेको बताइन् । ‘महिनाबारी भएकाबेला केही समस्या आए शिक्षक र साथीहरूलाई भन्ने गरेका छौं,’ उनले भनिन्, ‘स्वास्थ्यकर्मीले विद्यालयमै आएर तालिम लिएपछि महिनावारीलाई सहज तरिकाले लिन थालेका हौं ।’

तातोपानी गाउँपालिका अध्यक्ष नवराज न्यौपानेले गाउँपालिका भरिका सबै विद्यालयमा सहिनावारीसम्बन्धी स्वास्थ्य शिक्षा र सेनेटरी प्याड निर्माण विधिबारे अभियान सञ्चालन गर्न लागिएको बताए ।

एलपी देवकोटाले कान्तिपुरमा खबर लेखेका छन् ।

Comments: