२०७६ भदौ ३० गते

चिटिक्क विद्यालय भवन पाउँदा विद्यार्थी दंग

सिन्धुपाल्चोक । भूकम्पपछि त्रिपाल र जस्ताको अस्थायी टहरोमा पढ्दै आएका महाकाली सेतीदेवी आधारभूत विद्यालयका विद्यार्थीले भूकम्पप्रतिरोधी भवन पाएका छन्।

टहरोभित्रै चुहिने हिउँदे शीत र बर्खे झरीमा रुझ्दै पढ्न बाध्य विद्यार्थी चिटिक्क भवन पाउँदा मख्ख छन्। घामपानीबाट, शीत र झरीबाट छुटकारा पाउँदा उनीहरु त्योभन्दा बढी खुशी देखिए । स्थानीय अभिभावकको सक्रियता र चन्दामा बनेको विद्यालय भवन भूकम्पले ढालेको थियो ।

भूकम्पपछिको पुनर्निर्माण अन्तर्गत जिल्ला शिक्षा कार्यालय, जिल्ला आयोजना कार्यान्वयन इकाइ र दाताको सहयोगमा दुई तले चारकोठे विद्यालय भवन बनेको हो । ‘अब ढुक्कले पढ्न पाउने भयौँ,’ विद्यार्थी अञ्जली तामाङले भनिन्, ‘घामपानी, झरी र हावाहुरीबाट डर नहुने भो ।’

विद्यालयको २१ औँ वार्षिकोत्सवको अवसरमा चौतारा साँगाचोकगढी नगरपालिकाका प्रमुख अमानसिंह तामाङले नवनिर्मित भवनको उद्घाटन गरे । समयमै निर्माण सकेर पुनर्निर्माणमा सघाएको भन्दै उनले विद्यालय र व्यवस्थापन समितिलाई धन्यवाद थिए ।

विद्यालयका प्रधानाध्यापक जनकराज गिरीले झण्डै ६८ लाख रुपैयाँ लागतमा भवन पुनर्निर्माण भएको बताए। उनका अनुसार आयोजना कार्यान्वयन इकाइले भवन निर्माणका लागि ६० लाख २८ हजार रुपैयाँ बजेट छुट्याएका थियो । ललितपुरका दाता श्यामकाजी अवालेले ६ लाख ६६ हजार रुपैयाँ बराबरको विद्यालय भवनमा प्रयोग भएका ४३ हजार ७ सय ईँटा सहयोग गरेका थिए।

अपांगमैत्री रहेको उक्त विद्यालय भवन जिल्लामा सरकारी लगानीमा भूकम्पपछि पुनर्निमाण भएको पहिलो सामुदायीक शैक्षिक संस्था हो । भूकम्पमा जिल्लाका ५ भन्दाबढी सामुदायिक विद्यालय क्षतिग्रस्त भएका थिए । नयाँ भवन पाएको खुशीमा उक्त विद्यालयमा अध्ययनरत १ सय १९ विद्यार्थी, अभिभावक र शिक्षकले यो पटकको वार्षिकोत्सव भव्य ढंगले मनाए।


नागरिक दैनिकमा खबर छ ।

 

Comments: